இஸ்லாமும் குளிர்காலமும்

இஸ்லாமும் குளிர்காலமும்

அல்லாஹ் இந்த உலகத்தை அற்புதமான முறையில் படைத்திருக்கிறான். ஒவ்வொரு விஷயத்தையும் நுணுக்கமான முறையில் வடிவமைத்திருக்கிறான். அல்லாஹ்வின் படைப்பாற்றலும், வடிவமைக்கும் திறனும் அழகானது. அதில் எந்த சந்தேகமும் யாருக்கும் இருக்க முடியாது.

அவ்வாறு அல்லாஹ்வால் படைக்கப்பட்டுள்ள ஒன்றுதான் காலமாற்றங்கள். ஒரு வருடத்தில் இரண்டு விதமான பருவ மாற்றங்கள் ஏற்படும். ஒன்று குளிர் காலம் மற்றொன்று கோடைக்காலம். இவ்விரு கால மாற்றங்களும் மனிதர்களுக்கு பல்வேறு விஷயங்களை உணர்த்தக்கூடியதாக இருக்கின்றன. மனிதர்கள் படைக்கப்பட்ட நோக்கத்தை வெளிப்படுத்தக்கூடியவையாக இருக்கின்றன.

இந்த குளிர்காலங்களையும் கோடைகாலங்களையும் நாம் எவ்வாறு பயன்படுத்த வேண்டும்? என்பதை இஸ்லாம் தெளிவான முறையில் நமக்கு கற்று தருகிறது.

இந்த கட்டுரையில் குளிர்காலம் தொடர்பாக இஸ்லாம் சொல்லித் தரும் விஷயங்களைப் பற்றி அறிவோம்.

குளிர்காலம் உருவான வரலாறு :

உடலை உறைய வைக்கும் குளிர்காலத்தை அல்லாஹ் ஏன் ஏற்படுத்தினான்? குளிர்காலம் ஏற்படுவதற்கு காரணம் யார்? இதுபோன்ற பல கேள்விகளுக்கு விடையாக நபிகள் நாயகத்தின் ஒரே ஒரு பொன்மாெழி அமைந்துள்ளது.

وَاشْتَكَتِ النَّارُ إِلَى رَبِّهَا فَقَالَتْ : يَا رَبِّ، أَكَلَ بَعْضِي بَعْضًا، فَأَذِنَ لَهَا بِنَفَسَيْنِ : نَفَسٍ فِي الشِّتَاءِ، وَنَفَسٍ فِي الصَّيْفِ، فَهُوَ أَشَدُّ مَا تَجِدُونَ مِنَ الْحَرِّ، وَأَشَدُّ مَا تَجِدُونَ مِنَ الزَّمْهَرِيرِ ".

இறைத்தூதர்(ஸல்) அவர்கள் கூறினார்கள்:
'இறைவா! என்னுடைய ஒரு பகுதி, மறுபகுதியைச் சாப்பிட்டுவிட்டது என்று நரகம் இறைவனிடம் முறையிட்டது. கோடையில் ஒரு மூச்சு விடுவதற்கும் குளிரில் ஒரு மூச்சு விடுவதற்கும் இறைவன் அதற்கு அனுமதி வழங்கினான். கோடை காலத்தில் நீங்கள் காணும் கடுமையான வெப்பமும் குளிர் காலத்தில் நீங்கள் உணரும் கடும் குளிரும் அதன் வெளிப்பாடுகள் தாம்.'
என அபூ ஹுரைரா(ரலி) அறிவித்தார்.
ஸஹீஹ் புகாரி : 537.

நரகம் என்று சொன்னவுடனே நம்முடைய உள்ளத்தில் தோன்றுவது நெருப்புதான். அல்லாஹ் நரகத்தில் கொடிய நெருப்பை தயாரித்து வைத்திருக்கிறான். ஆனால் நரகம் முழுவதும் ஒரே அளவுடைய வெப்பத்தைக் கொண்ட நெருப்பாக இருக்காது. சில இடங்களில் வெப்பத்தின் அளவு  உச்சக்கட்டமாக இருக்கும். சில இடங்களில் சற்று குறைவாக இருக்கும். ஆனால் இவ்வுலகத்தை விட அதிக வெப்பமுள்ளதாகத்தான் நரகம் இருக்கும். மனிதர்கள் செய்யக்கூடிய தண்டனைக்கு ஏற்ற வகையில் அவர்களுக்குண்டான வெப்பத்தின் அளவு அவர்களுக்கு வழங்கப்படும்.

பொதுவாக நெருப்பின் தன்மை என்னவென்றால், அது எதன்மீது இருக்கிறதோ அதை சாப்பிட்டுவிடும். நெருப்பு ஒரு தாளின் மீது இருந்தால் அந்த தாளை நெருப்பு சாப்பிட்டுவிடும். இதுதான் நெருப்பின் தன்மை. அதேபோன்று நரகத்தில் அதிக வெப்பமுடைய பகுதிகள் சற்று குறைவான அளவுடைய பகுதிகளை சாப்பிட்டுவிடுகிறது. இதனால் பாதிக்கப்பட்ட நரகம் அல்லாஹ்விடத்தில் முறையிடுகிறது. தனது பாதிப்பை தீர்க்குமாறு அல்லாஹ்விடத்தில் கோரிக்கை வைக்கிறது.

அதற்கு அல்லாஹ் நரகத்திடம், ஒரு வருடத்திற்கு இரண்டு முறை மூச்சுவிடுமாறு கட்டளை பிறப்பிக்கின்றான். ஒன்று குளிர்காலத்திலும் மற்றொன்று கோடை காலத்திலுமாக இரண்டு முறை மூச்சை நரகம் விட வேண்டும். அதன் மூலம் அதன் ஒரு பகுதி மற்றொரு பகுதியை சாப்பிடுவது தடுக்கப்படும்.

குளிர்காலம் தோற்றுவிக்கப்பட்ட வரலாற்றைத்தான் மேற்கண்ட நபிமொழி மூலம் நபிகள் நாயகம் நமக்கு கற்றுத் தந்திருக்கிறார்கள்.

மேற்கண்ட நபிமொழிமூலம் அல்லாஹ்வின் கருணையை நாம் உணர்ந்து கொள்ளலாம். நரகம் தனக்கு ஏற்பட்ட கஷ்டத்தை இறைவனிடத்தில் முறையிட்டது. அதை இறைவன் நிவர்த்தி செய்து வைத்திருக்கிறான். அதேபோல் நாமும் நமக்கு ஏற்படும் கஷ்டங்களை சிரமங்களை இறைவனிடத்தில்தான் முன்வைக்க வேண்டும். அவன் ஒருவனால்தான் நம்முடைய இன்னல்களை தீர்க்க முடியும்.

அதேபோல் மேற்கண்ட நபிமொழிமூலம் அல்லாஹ்வுடைய படைப்பின் நுட்பத்தையும் உணர்ந்து கொள்ளலாம். எப்படியெனில், நரகம் கடும் சூடானது.சூட்டிலிருந்து இன்னொரு சூட்டைத்தான் உருவாக்கலாம். ஆனால் அல்லாஹ் அந்த சூட்டிலிருந்து குளிரை உற்பத்தி செய்ய வைத்திருக்கிறான். நரக வெப்பத்தின் மூச்சுக்காற்றிலிருந்து குளிர்காலத்தை உருவாக்கியிருப்பது இறைவனுடைய படைப்பின் நுட்பத்தை உணர்த்தக்கூடியதாக இருக்கிறது.

குளிரை தாங்கும் கம்பளி

இந்த இடத்தில் உங்களுக்கு ஒரு சந்தேகம் எழலாம். அது என்னவெனில், நரகத்திற்கு ஒரு பிரச்சனை ஏற்பட்டது. தனது பிரச்சனையை நரகம் அல்லாஹ்விடத்தில் முறையிட்டது. அல்லாஹ் அதை தீர்த்து வைத்தான். ஆனால் அதற்காக மனிதர்கள் பாதிக்கப்படலாமா? நரகத்தை பாதுகாத்து மனிதர்களுக்கு பாதிப்பை ஏற்படுத்துவது நியாயமா?

இதுபோன்ற சந்தேகம் எழுந்தால் நீங்கள் அல்லாஹ்வை சரியாக அறியவில்லை என்று அர்த்தம். ஏனெனில் அல்லாஹ் மனிதர்கள் மீது அளப்பெறும் அருள் புரியக்கூடியவனாகவும், கருணைக்காட்டக்கூடியவனாகவும் இருக்கிறான். அப்படியிருக்கையில் நரகத்திற்கு மட்டும் நன்மை செய்து மனிதர்களுக்கு மட்டும் எப்படி தீமை புரிவான்? இறைவன் நிச்சயமாக இதபோன்று நடந்து கொள்ளமாட்டான்.

சரி, அப்படியென்றால் குளிர்காலத்தில் ஏற்படும் கடும் குளிர் மனிதர்களுக்கு பாதிப்பில்லையா? உடலை உறைய வைக்கும் அளவுக்கு குளிரின் அளவு கூடுவது மனிதர்களுக்கு தீங்காகத்தானே இருக்கிறது! இதுபோன்ற கேள்விகள் உங்களுக்கு எழுந்தால் நீங்கள் திருமறைக்குர்ஆனில் படிக்க வேண்டிய வசனம் அந்நஹ்ல் அத்தியாயத்தின் 5வது வசனம்.

(அல்லாஹ் கூறுகிறான்) கால்நடைகளை உங்களுக்காகவே அவன் படைத்தான். அவற்றில் குளிரைத் தடுப்பவை (கம்பளி) உண்டு. பல பயன்களும் உள்ளன. அவற்றிலிருந்து சாப்பிடுகிறீர்கள். (அல்குர்ஆன் 16:5)

இந்த வசனத்தில் இறைவனின் கருணை தெளிவாக வெளிப்படுகிறது. எவ்வாறெனில்,  நரகம் விடக்கூடிய மூச்சுக்காற்றினால் பூமியில் கடும் குளிர் ஏற்படுகிறது. அந்த குளிரை மனிதர்களால் தாங்கிக்கொள்ள முடியாது. ஆகவே மனிதர்களுக்கு குளிரைத் தாங்கிக் கொள்ள ஏதாவதொன்றை வழங்க வேண்டும். ஆகவே இறைவன் கால்நடைகளை படைக்கிறான்.

மேற்குறிப்பிட்ட வசனத்தில், கால்நடைகள் வேறு எதற்காகவும் படைக்கப்படவில்லை. மனிதர்களுக்காக மட்டுமே படைக்கப்பட்டுள்ளன. அதிலும் குறிப்பாக மனித இனம் குளிரைத் தாங்கிக் காெள்ள வேண்டும் என்பதற்காகவே இறைவன் படைத்திருக்கிறான் என்பதை உணர்த்துகின்றன. குளிரைத் தாங்கிக் காெள்வதற்காகவே ஒரு புதிய படைப்பை இறைவன் உருவாக்கியிருக்கிறான் என்றால் இறைவனின் கருணைதான் எவ்வளவு மகத்தானது.

ஆகவேதான் நாம் குளிர்காலங்களில் கால்நடைகளிலிருந்து பெறப்படும் கம்பளியால் நெய்யப்பட்ட ஆடைகளையும் போர்வைகளையும் பயன்படுத்துகிறோம். இவைகள் குளிருக்கு இதமாகவும், கடும் குளிரிலிருந்து நம்மை பாதுகாக்கக்கூடியவனாகவும் அமைந்திருக்கின்றன.

மகிழ்ச்சி தரும் குளிர்காலம்

இறைவனின் கருணை அளப்பெரியதல்லவா. ஆகவே இறைவனின் கருணை இத்தோடு நின்றுவிடவில்லை. இன்னும் தொடர்கிறது.

ஆகவே, குளிர் என்றாலே மனிதர்களுக்கு தீங்குதான். மனிதனுடைய உடலுக்கு பாதிப்புத்தான் என்று நாம் எண்ணிவிடக்கூடாது. குளிரை மனிதர்கள் தாங்கிக் கொள்ள வேண்டும் என்பதற்காக கால்நடைகளைப் படைத்ததோடு மட்டுமல்லாமல் குளிரில் இன்னும் சில நன்மைகளையும் இறைவன் ஏற்படுத்தி தந்திருக்கிறான்.

இதை இறைவன் அல் குரைஷ் என்ற அத்தியாயத்தில் குறிப்பிட்டுக் காட்டுகிறான்.

குரைஷிகளை மகிழ்வித்ததற்காகவும், குளிர் மற்றும் கோடை காலப் பயணங்களில் அவர்களை மகிழ்வித்ததற்காகவும் இந்த ஆலயத்தின் இறைவனை அவர்கள் வணங்கட்டும். (அல்குர்ஆன் 106:1-4)

இறைவன் மக்கத்து குறைஷிகளுக்கு ஏகப்பட்ட சிறப்புகளை வழங்கியிருந்தான். அவர்களை கஅபாவை நிர்வகிப்பவர்களாகவும், மக்கா பிரதேசத்தின் தலைவர்களாகவும் இறைவன் ஆக்கியிருந்தான். இது அவர்களுக்கு மகிழ்ச்சி தரக்கூடிய விஷயமாக இருந்தது.

அதேபாேல் குறைஷிகளுக்கு மகிழ்ச்சி தரக்கூடிய மற்றொரு விஷயம்தான் கோடை, குளிர் கால பயணங்கள். குளிர்காலத்தில் பயணம் மேற்கொள்வது குறைஷிகளுக்கு மகிழ்ச்சி தரக்கூடிய ஒன்றாக இறைவன் ஆக்கியிருந்தான். இன்றும் அரபு மக்கள் குளிர்காலங்களில் பயணம் செய்யக்கூடியவர்களாகவே உள்ளனர்.

நாம்கூட குளிர்காலம் வந்துவிட்டால் ஏதாவததொரு சுற்றலா தளத்திற்கு செல்லத் துவங்கிவிடுவோம். பள்ளி, கல்லூரிகளும் குளிர்காலத்திற்கென விடுமுறைகளை அறிவித்திருக்கும். காரணம் குளிர்காலம் வந்துவிட்டால் சுற்றுலா செல்ல வேண்டும். அதன்மூலம் மனதிற்கு நிம்மதியும் மகிழ்ச்சியும் கிடைக்கும்.

ஆகவே இறைவன் குளிர்காலத்தை மனித உள்ளத்துக்கு மகிழ்ச்சிதரக்கூடியதாகவே மாற்றியிருக்கிறான்.

குளிர்காலத்தில் வணக்கவழிபாடுகள்

மனிதர்கள் குளிரைத் தாங்குவதற்காக கால்நடைகளைப் படைத்து, குளிர்காலப் பயணத்தை மனிதர்களுக்கு மகிழ்ச்சி தரக்கூடியதாகவும் இறைவன் ஆக்கியிருக்கிறான். இவ்வாறு இறைவன் புரிந்த இந்த அருட்கொடைகளுக்கு நாம் நன்றி செலுத்த வேண்டாமா?

குரைஷிகளை மகிழ்வித்ததற்காகவும், குளிர் மற்றும் கோடை காலப் பயணங்களில் அவர்களை மகிழ்வித்ததற்காகவும் இந்த ஆலயத்தின் இறைவனை அவர்கள் வணங்கட்டும்.
திருக்குர்ஆன்[106:3]

குளிர்கால பயணத்தின் மூலம் நாம் மகிழ்ச்சியைப் பெற்றுக் கொண்டதற்காக இறைவனை நாம் வணங்க வேண்டும். அதுதான் இறைவனுக்கு நன்றி செலுத்தக்கூடியதாக அமையும்.  அதைத்தான் இறைவன் மேற்கண்ட வசனத்தில் குறிப்பிட்டுக்காட்டுகிறான்.

அதுமட்டுமில்லாமல் குளிர்காலம் சில வணக்க வழிபாடுகளை நிறைவேற்றுவதற்கு தோதுவான காலமாகவும் அமைந்திருக்கிறது. ஏனெனில் குளிர்காலம் ஆரம்பித்துவிட்டால் பகல் சுருங்கிவிடும். இரவு நீண்டுவிடும். பகல் நேரம் குறைவாகவும் இரவு நேரம் அதிகமாகவும் காணப்படும். ஆகவே நாம் அதிகமாக நோன்பு நோற்கலாம். வெயிலின் தாக்கம் குறைவாக இருப்பதாலும், பகலின் நேரம் சுருக்கமாக இருப்பதாலும் நோன்பு நோற்பதற்கு ஏற்ற காலமாக குளிர்காலம் அமைந்துள்ளது.

அதேபோல், இரவு நேரம் நீளமாக இருப்பதால் அதிக நேரம் நின்று வணக்க வழிபாடுகள் புரியலாம். இரவுத் தொழுகையை நீண்ட நேரம் நின்று வணங்குவதற்கு ஏற்ற காலமாகவும் குளிர்காலம் அமைந்துள்ளது.

குளிர்கால வணக்கவழிபாட்டிற்கு அதிக கூலி

குளிர்காலத்தை உங்களது மகிழ்ச்சிக்குரியதாக நான் ஆக்கியிருக்கிறேன். ஆகவே நீங்கள் என்னை வழிபடுங்கள். எனக்கு நன்றி செலுத்துங்கள் என்று இறைவன் கூறியுள்ளான். அதுமட்டுமில்லாமல் குளிர்காலத்தை வணக்க வழிபாடுகள் புரிவதற்கு ஏற்ற காலமாகவும் மாற்றியிருக்கிறான்.

இத்தோடு நின்றுவிடாமல் குளிர்காலத்தில் நாம் புரியும் வணக்க வழிபாடுகளுக்கு இறைவன் அதிக கூலியையும் தருவதாக இறைவன் கூறுகிறான்.

அபூஹுரைரா (ரலி) அவர்கள் கூறியதாவது:
(ஒரு முறை) அல்லாஹ்வின் தூதர் (ஸல்) அவர்கள், (உங்கள்) தவறுகளை அல்லாஹ் மன்னித்து, தகுதிகளை உயர்த்தும் செயல்கள் சிலவற்றை உங்களுக்கு நான் சொல்லட்டுமா? என்று கேட்டார்கள். மக்கள், ஆம்; (சொல்லுங்கள்) அல்லாஹ்வின் தூதரே! என்று கூறினர். அல்லாஹ்வின் தூதர் (ஸல்) அவர்கள், (அவை:) சிரமமான சூழ்நிலைகளிலும் அங்கத் தூய்மையை முழுமையாகச் செய்வதும், பள்ளிவாசல்களை நோக்கி அதிகமான காலடிகளை எடுத்துவைத்துச் செல்வதும், ஒரு தொழுகைக்குப் பின் அடுத்து தொழுகையை எதிர்பார்த்துக் காத்திருப்பதும் ஆகும். இவைதாம் கட்டுப்பாடுகளாகும் என்று கூறினார்கள்.
ஸஹீஹ் முஸ்லிம் : 421.

கோடைகாலத்தில் வெயில் அதிகமாக இருக்கும். நம் மனம் தண்ணீரைத் தேடும். ஆனால் குளிர்காலத்தில் குளிர் அதிகமாக இருக்கும். ஆகவே மனம் தண்ணீரைக் கண்டால் வெருண்டுஓடும். தண்ணீரைத் தொடுவதே பெரும்பாடாக இருக்கும். அப்படிப்பட்ட சிரமமான சூழ்நிலையில், முழுமையான முறையில் உளூ செய்தால் இறைவன் நம்முடைய பாவங்களை மன்னிப்பான். அல்லது நம்முடைய தகுதிகளை உயர்த்துவான்.

சாதாரண காலங்களில் உளூ செய்வதைவிட குளிர்காலங்களில் உளூ செய்வது அதிக நன்மையைப் பெற்றுத்தரும். நம்முடைய பாவங்கள அழியும் அல்லது தகுதிகள் உயரும். இரண்டில் ஒன்று கண்டிப்பாக கிடைத்தே தீரும். எவ்வளவு பெரிய சிறப்பு. எவ்வளவு பெரிய வாய்ப்பு.

அதேபோன்று குளிர் நேரத் தொழுகைக்கும் இஸ்லாம் சிறப்பு அந்தஸ்து வழங்கியிருக்கிறது.

இஸ்லாம் ஒரு நாளைக்கு ஐந்து தடவைகள் கட்டாயமாக தொழவேண்டும் என்று கட்டளையிடுகிறது. ஃபஜ்ர், லுஹர், அஸர், மஃரிப், இஷா ஆகிய ஐந்து தொழுகைகளை பருவமடைந்த ஆணும் பெண்ணும் கட்டாயமாக நிறைவேற்ற வேண்டும்.

இதில் சூரியன் உதிப்பதற்கு முன் தொழப்படும் தொழுகையாக ஃபஜ்ர் தொழுகையும், சூரியன் மறைவதற்கு முன்னதாக தொழப்படும் தொழுகையாக அஸ்ர் தொழுகையும் அமைந்துள்ளது. இவ்விரண்டு நேரமும் குளிர்ந்த நேரங்கள். ஆகவே இவ்விரண்டு தொழுகையை இஸ்லாம் குளிர்நேரத் தொழுகை என்று அழைக்கிறது.

அல்லாஹ்வின் தூதர் (ஸல்) அவர்கள் கூறினார்கள்:
பகலின் இரு முனைகளிலுள்ள (ஃபஜ்ர், அஸ்ர் ஆகிய) இரு குளிர் நேரத்தொழுகைகளைத் தொழுபவர் சொர்க்கத்தில் நுழைவார்.
இதை அபூமூசா அல்அஷ்அரீ (ரலி) அவர்கள் அறிவிக்கிறார்கள்.
ஸஹீஹ் முஸ்லிம் : 1117.

கோடைகாலமாக இருந்தாலும் குளிர்காலமாக இருந்தாலும் ஃபஜ்ர் நேரமும் அஸ்ர் நேரமும் இதமான நேரமாக இருக்கும். இவ்விரு நேரங்களும் குளிர்ச்சியான நேரங்கள். ஆகவே இந்நேரங்களில் தொழுதால் கட்டாயமாக சொர்க்கத்தில் நுழைந்துவிடலாம் என்று நபிகள் நாயகம் (ஸல்) அவர்கள் கூறுகிறார்கள்.

ஏனெனில் இவ்விரு நேரங்களில் தொழுகைக்காக செல்வது சற்று சிரமமாக இருக்கும். இவ்விரு நேரங்களிலும் ஷைத்தான் நம்மை பலவீனப்படுத்த முயற்சிப்பான். நாம் அதை முறியடித்து குளிர்நேரத் தொழுகையை சரியாக நிறைவேற்றினால் சொர்க்கத்தில் நுழைந்துவிடலாம்.

சாதாரண காலங்களில் குளிர்நேரத் தொழுகையை தொழுதாலே இவ்வளவு சிறப்புகள் இருக்கிறதென்றால், குளிர்காலத்தில் தாெழப்படும் தொழுகைக்கு எவ்வளவு சிறப்புகள் இருக்கும்!

ஆகவே குளிர்காலத்தில் நாம் செய்யும் வணக்க வழிபாடுகளுக்கு அதிக கூலிகள் கிடைக்கும் என்று இஸ்லாம் கூறுவதை நினைவில் நிறுத்திஅதிகமதிகம் அமல்கள் புரிய வேண்டும்.

குளிர்காலத்தில் இலகுவாக்கப்படும் வணக்கங்கள்

இறைவன் குளிர்காலத்தை தாங்கிக் கொள்வதற்காக கால்நடைகளை தயாரித்து அதிலிருந்து கம்பளியை வெளிப்படுத்தினான். மேலும் குளிர் கால பயணத்தை மகிழ்ச்சிக்குறியதாக ஆக்கினான். குளிர்காலத்தை வணக்க வழிபாடுகள் செய்வதற்கு ஏற்றதாக ஆக்கினான். குளிர்காலத்தில் செயய்யும் வணக்க வழிபாடுகளுக்கு அதிக கூலியையும் தரக்காத்திருக்கிறான்.

அத்தோடு குளிர்காலத்தில் நம்முடைய வணக்க வழிபாடுகளை இலகுாகவும் இஸ்லாம் மாற்றியிருக்கிறது.

நாஃபிவு கூறினார்:
குளிரும் காற்றும் நிறைந்த ஓர் இரவில் தொழுகைக்காக இப்னு உமர்(ரலி) பாங்கு சொன்னார்கள். பின்னர் 'உங்கள் கூடாரங்களிலேயே தொழுது கொள்ளுங்கள்' என்றார்கள். 'குளிரும் மழையுமுள்ள இரவுகளில் கூடாரங்களிலே தொழுங்கள் என்று கூறுமாறு நபி(ஸல்) அவர்கள் முஅத்தினுக்கு உத்தரவிடுவார்கள்' என்றும் கூறினார்கள்.
ஸஹீஹ் புகாரி : 666.

குளிர்காலத்தில் தொழுகையை நிறைவேற்றுவதற்கு அதிக கூலிகள் உண்டு. ஆனால் குளிரான இரவுகளில் வீடுகளிலிருந்து கிளம்பி பள்ளிக்கு வந்தால் உடல்நிலை கெட்டுப் போக வாய்ப்புள்ளது. குளிர்ந்த காற்று வீசுவதினால் ஜலதோஷம், காய்ச்சல் போன்றவை ஏற்படலாம். இதனால் மனிதர்களுக்கு பாதிப்பு ஏற்படலாம்.

ஆகவே கருணையாளனாகிய அல்லாஹ், மனிதர்களின் சிரமத்தை நீக்குவதற்கு சில சலுகைகளை வழங்கியுள்ளான். குளிரும் காற்றும் இருக்கும் இரவுகளில் நீங்கள் தொழுகையை நிறைவேற்றுவதற்காக பள்ளிக்கு வர அவசியமில்லை. நீங்கள் உங்கள் வீடுகளிலேயே தாெழுதுகொள்ளலாம் என்று நபிகள் நாயகம் தெரிவிக்கிறார்கள்.